Спорт – тормыш юлдашым

Бер-берсен алыштырып торган бәйрәм даталары арасында озакламый билгеләп үтеләчәк Физкультурачылар көне аерым игътибарга лаек.
Чөнки һәркемнең тормышында спортка, физкультурага урын бар. Кемдер мәктәп, студент елларында, кемдер хезмәт коллективында ярышларда катнаша. Ә Леонид Белоногов бер көнен дә спорт белән шөгыльләнми уздырмый.
- Мин спортка мәхәббәт белән туганмын. Кечкенәдән шук, тиктормас идем. Дүртенче мәктәптә белем алу дәверендә физкультура укытучыларым Маргарита Ситдыйкова, Татьяна Тарасова, Владимир Денисов бу өлкәдә мөмкинлекләремне күреп, миңа игътибар бирделәр. Нинди генә түгәрәкләргә йөрмәдем. Баштарак учреждение, соңрак район, аннан республика күләмендә җиңел атлетика, чаңгы, баскетбол, волейбол буенча ярышларда катнаштым. Ул чорда массакүләм спортка игътибар зур иде. Хәзер шәһәрдә заманча спорт мәйданчыклары, бассейн, боз сарае ачылды. Болар куанычлы вакыйгалар. Менделеевлыларны спорт белән ешрак шөгыльнәнергә өндәр идем. Бу өлкәдә әле безгә эшләргә дә эшләргә, - дип фикере белән бүлешә әңгәмәдәшебез.
Спорттагы уңышлары аңа училищеда, техникумда укыганда да, соңрак армия сафларына алынгач та ярдәм иткән.
- Спорт - минем икенче һөнәрем дисәң дә була. Калининградта милиция мәктәбендә хәрби-кулланма спорт төрендә чарландым. Казанның Мәскәү районында җинаятьчеләрне эзләү бүлегендә хезмәт иткән чорда күп каршылыкларны җиңүдә (многоборье) үземне сынадым. Шөгыльләнми калган спорт төрләре аздыр. Озак хәрәкәтсез торсам, авыруга сабышам.
Кызым Наталья белән улым Андрей да спорт белән балачактан кызыксындылар. Минем белән ярышларга йөрделәр. Кызым һөнәре буенча психолог, тренер булып та эшләде. Андрей да шәхси эшмәкәр мәшәкатьләре арасында спортка вакыт таба, - дип сөйли спортчы.
Яр Чаллы, Түбән Кама, пенсиягә чыгар алдыннан Менделеевск полиция бүлегендә хезмәт куйган Леонид Александрович сәламәт тормыш рәвешен үз иткән. Хезмәт һәм хәрби хәрәкәтләр ветераны һаман да эчке эшләр бүлеге җыелма командасында тора.
Күптән түгел министрлык оештырган триатлон (йөзү, йөгерү, велосипедта таудан йөрү) буенча беренчелекне алган. ТР буенча чемпионатта Макаров пистолетыннан атып һәм 5 километрга йөгереп призлы икенче урынны яулаган.
- Россия күләмендә уздырылган спартакиадада Татарстан ветераннары дүртенче ел беренчелекне бирмиләр. Киләчәктә дә бу югарылыктан төшмәскә иде, - дип горурланып сөйли Л.Белоногов.
Спорт өлкәсендә зур тәҗрибә туплаган, төрле разрядларга ирешкән Леонид Александрович шәһәрдә физкультура хәрәкәтен үстерүгә өлеш кертергә - тренер буларак укучы балалар белән шөгыльләнергә исәпли. Даими күнегүләрдә чыныккан, ихтыярлы, көчле спорт мастеры Леонид Белоногов хыялын тормышка ашырмый калмас.